A certificación de Mexillón de Galicia duplicouse no 2014

A certificación de Mexillón de Galicia con Denominación de Orixe Protexida duplicouse durante o ano 2014, segundo se desprende do balance anual do Consello Regulador. O volume de mexillón certificado en porto superou os 33,1 millóns de Kg netos certificados fronte aos 16,7 do 2013, acadando así un novo fito. Ademais, durante o pasado exercicio o Consello Regulador creou un Directorio de Marcas para dar resposta ás novas empresas que solicitaban o uso do selo Mexillón de Galicia.

A DOP Mexillón de Galicia acadou no 2014 un novo récord, ao rexistrar 33’1 millóns de quilos de mexillón certificado en porto, confirmando así a tendencia ascendente da certificación nos últimos anos. O incremento no volume produciuse a pesares da presenza da marea vermella, que ocasionou tres intensos peches administrativos dos polígonos de bateas e obrigou a interromper as actividades de certificación.

Evolución anual da certificación

O principal destino do mexillón certificado segue a ser a industria transformadora, que absorbeu o 90% do volume total con 29,9 millóns de kg netos. Esta cifra supón case o dobre que a rexistrada no 2013 (15,2 millóns) e revela a crecente importancia da DOP como elemento diferenciador no mercado da conserva, un ámbito no que a orixe galega constitúe un reclamo de prestixio para o consumidor.

No caso do mexillón con destino ao mercado do fresco, o volume tamén se dobrou ao pasar dos 1,5 millóns de kg do 2013 aos 3,1 millóns do 2014. O incremento da demanda coincidiu coa campaña promocional posta en marcha nos puntos de venda, baixo o lema “Namórate dun galego”, que supuxo a entrada do mexillón fresco con DOP en máis de 1.500 supermercados de El Corte Inglés, Vegalsa-Eroski, Gadis, Froiz, Alcampo, Carrefour, Consum, El Arco, Sabeco, Lupa e Telco. Neste caso, a principal vantaxe comparativa do mexillón fresco con DOP é a garantía de calidade que lle ofrece ao consumidor, cun rendemento en carne garantido que supera con diferenza os estándares habituais do mercado.

Destino mexillón certificado 2014

Por outra banda, o mexillón certificado nos portos significou en primeira venda un valor de 14,7 millóns de euros; destes, 12,9 corresponderon ao mexillón con destino á industria, e 1,8 millóns ao mexillón con destino fresco.

Para o Consello Regulador, os datos arroxados polo balance anual do 2014 indican que o Mexillón de Galicia está acadando cada vez máis prestixio e notoriedade no mercado. Con todo, o obxectivo do Consello Regulador é máis amplo e pretende acadar un maior coñecemento do selo no mercado, transmitíndolle ao consumidor as garantías e vantaxes da DOP e aumentar así o valor do produto.

Directorio de marcas
No ano 2014 o Consello Regulador creou un Directorio de Marcas, que se sumou aos Rexistros existentes de bateas e de empresas certificadas. A creación do novo rexistro respondeu á demanda de empresas alimentarias que, aínda non sendo elaboradoras, desexaban comercializar os seus produtos de mexillón co selo da Denominación de Orixe, encargando a súa elaboración a empresas certificadas. Así, o directorio é un instrumento de control necesario para acreditar a titularidade das marcas e para autorizar o seu uso co amparo da DOP. Na actualidade estanse a tramitar 7 solicitudes de inscrición.

Así mesmo, o Rexistro de Empresas certificadas, entre as que se inclúen depuradoras de moluscos e de transformación, chegou no 2014 a 33, dúas máis ca no ano anterior.

En total, máis de 40 marcas comerciais teñen presenza no mercado nacional e internacional amparadas co selo da DOP. A oferta de produtos das diferentes marcas supera o centenar de formatos diferentes dirixidos ao consumidor final.

Produtos con maior presenza no mercado
A industria transformadora comercializou no 2014 máis de 13 millóns de latas de conserva de Mexillón de Galicia, o que supuxo o formato con DOP con maior porcentaxe no mercado de produto transformado. Seguíronlle en importancia o mexillón conxelado en media cuncha (391.000 kg), a vianda conxelada (181.000 kg) e o mexillón conxelado na súa auga (149.000 kg).

Por outra banda, no 2014 os diferentes elaborados con DOP (conserva, conxelados, refrixerados…) consolidaron a súa presenza internacional, mediante as exportacións a diversos países, entre os que figuran Italia, Francia, Alemaña, Estados Unidos, México e Singapur.

En canto ao mercado do fresco, durante o 2014 comercializáronse 1,5 millóns de quilos de Mexillón de Galicia con DOP. O principal destino xeográfico foi a península Ibérica e o principal canal de venda, as peixerías das grandes superficies comerciais.

Controis
O Consello Regulador exerce o control da DOP Mexillón de Galicia desde as primeiras fases do cultivo ata a elaboración final dos produtos.

Nos portos, os técnicos de control do Consello realizaron durante o 2014 aproximadamente 11.000 controis, o que supón 2.500 accións máis ca no 2013. Este notable incremento das actividades amosa o relevante papel que exerce o Consello Regulador nas tarefas de control de produto e na intervención das transaccións comerciais dos portos.

Así mesmo, Bureau Veritas, que colabora co Consello Regulador nas actividades de certificación e inspección, realizou 167 auditorías en bateas e outras 66 auditorías en empresas comercializadoras certificadas.