Volve “Mexillón Challenge”

Tras o éxito alcanzado na primeira edición, volve “Mexillón Challenge”, unha iniciativa desenvolvida a través das redes sociais de Mexillón de Galicia ata o 27 deste mes de novembro e que forma parte da campaña de promoción que a DOP realiza no marco do convenio de colaboración coa Consellería do Mar, unha acción cofinanciada pola Unión Europea.

Se o ano pasado o protagonismo recaeu nos bateeiros, nesta ocasión céntrase noutros actores da cadea de valor, en concreto depuradores, elaboradores e conserveiros. Eles serán os encargados de lanzar os retos aos tres influencers elixidos para participar no “Mexillón Challenge”: Valentí Sanjuan, deportista con máis dun millón de seguidores; Xurxo Carreño, humorista con case cinco millóns de seguidores; e Marta Verona, gañadora de Master chef 6 e con medio millón de seguidores.

Cada un dos influencers recibirá un reto consistente na elaboración dunha receita con Mexillón de Galicia fresco, pasteurizado e en conserva. Unha vez que reciban o encargo, compartirano nas súas historias, seguidamente elaborarán a receita gravándoa e compartindo o resultado nas súas redes e nas de Mexillón de Galicia.

Outra das novidades ten que ver coa mensaxe que se quere trasladar a través desas accións, que non só busca poñer en valor a calidade de Mexillón de Galicia senón que tamén pretende potenciar a súa presenza na nosa dieta habitual ao tratarse dun alimento cunhas calidades nutricionais excepcionais. Para conseguilo, “Mexillón Challenge” recorre a unha estrutura formal divertida e a unha linguaxe desenfadada para elaborar unha mensaxe fresca, dinámica e adaptada a un público moi variado