A DOP Mexillón de Galicia ten en Conxemar a súa cita máis inmediata

Conxemar converterá a Vigo desde mañá e ata o xoves en punto de encontro do sector do mar nacional e internacional. A feira, consolidada como unha das máis importantes do mundo, concita a atención de almacenistas, importadores, exportadores, transformadores, fabricantes, distribuidores, frigoríficos e maquinaria e outros servizos auxiliares procedentes de distintos puntos do planeta. En total estarán representadas 754 empresas.

Neste gran escenario estará a DOP Mexillón de Galicia, continuando así coa ambiciosa estratexia de promoción que está a desenvolver en distintos ámbitos. Conxemar é unha gran oportunidade para mostrar a un público profesional e internacional os valores que converteron a Mexillón de Galicia nun selo de referencia no mercado, garante da orixe galega do mexillón e dunha calidade superior, dúas características que lle confiren un valor engadido ao que non queren renunciar nin os consumidores nin as empresas que comercializan mexillón co noso distintivo.

No expositor da DOP ofrecerase información das características que fan de Mexillón de Galicia un alimento único, como unha produción natural, a riqueza en nutrientes das rías galegas, os controis de calidade aos que está sometido… Tamén se poderán coñecer as súas extraordinarias cualidades nutricionais e como identificalo grazas ao seu inconfundible distintivo. Haberá igualmente ao dispor dos profesionais unha mostra dos diferentes formatos comerciais dos mexillóns amparados polo noso selo de calidade.

Acudir a Conxemar abre ademais novas posibilidades para contactar con compañías que teñan interese en acreditarse para comercializar Mexillón de Galicia. Igualmente, ofrecerase a empresas de distribución alimentaria a adquisición do noso produto. De aí sairá unha relación que se entregará ás empresas certificadas para que continúen o labor comercial de acordo coas  súas estratexias.