Mané Calvo, novo presidente do Consello Regulador da DOP Mexillón de Galicia

Mané Calvo García-Benavides, en representación do Grupo Calvo do que é conselleiro delegado, é o novo presidente do Consello Regulador da DOP Mexillón de Galicia tras o pleno celebrado esta tarde do que saíu elixido o substituto de Lina Solla Sanmartín, que ostentou este cargo desde o mes de novembro de 2020 e que deixa este posto despois de que a empresa pola que fora elixida como vogal (Linamar), e posteriormente como presidenta, fose adquirida por outra compañía. Legalmente, esa circunstancia impedíalle seguir á fronte do Consello Regulador.
A elección foi por unanimidade e se levou a cabo tras a votación efectuada polos doce vogais que integran o Pleno do Consello Regulador: Angélica Vázquez (Opmega), Esteban Fernández (Amegrove), José Francisco Otero Bea (Amegrove), José Manuel Oubiña Rial (APM Illa de Arousa), Juan Ramón Piñeiro (Opmega) e Francisco Alcalde (Opmega) en representación da produción.
Iván Alonso (Conservas Antonio Alonso), Enrique Mandado (Calvo) e Ana Margarita Hermo (Escuris), do sector da transformación.
Ramón García Suárez (Vengarco), José Luis Monteagudo (Pescadona) e Juan Soutullo (Barlovento), da depuración.
O novo presidente agradeceu o traballo de todos os seus predecesores e subliñou a vixencia dos obxectivos establecidos por Pleno do Consello Regulador en novembro de 2020. Entón se marcaron unha serie de liñas de actuación a desenvolver, algunhas das cales xa están en marcha, destinadas a dar un impulso renovado á DOP Mexillón de Galicia que contribúa a incrementar o seu prestixio no mercado.