Os alumnos do Carlos Oroza descubrirán o “mar de posibilidades” culinarias que ofrece Mexillón de Galicia

15 Novembro, 2018

Dúas xornadas dedicadas a show- cooking e outra na que se servirá un menú realizado a base de Mexillón de Galicia conforman o programa de actividades que desenvolverán conxuntamente a Denominación de Orixe Protexida Mexillón de Galicia e a Escola de Hostalería Carlos Oroza de Pontevedra durante os meses de novembro e decembro.

A iniciativa, denominada “ Mexillón de Galicia, un mar de posibilidades”, pretende achegar información de primeira man aos futuros profesionais da hostalería sobre as cualidades nutricionais dun alimento extraordinario como é Mexillón de Galicia, así como descubrir a enorme versatilidade culinaria que ofrece en calquera das distintas modalidades presentes no mercado o que, sen dúbida, é o representante máis significado da despensa mariña de Galicia.

Por suposto, tamén se quere animar ao consumo deste bivalvo ante a proximidade das datas do Nadal, un período no que Mexillón de Galicia atópase nun momento óptimo.

O primeiro “acto” desta iniciativa ponse en marcha este venres, día 16, na aula de I+D do centro académico pontevedrés da man dos alumnos de 2º de Dirección de Cociña do Carlos Oroza. Entre as 12 e as 13,30 horas, eles serán os encargados de presentar aos asistentes un show- cooking integrado por tres propostas: “Mexillón de Galicia ao curry” e “Mexillón de Galicia con escabeche de cítricos” (utilizando como materia prima Mexillón de Galicia fresco).

A segunda, que recorrerá a Mexillón de Galicia en conserva, constará de “Fabas con Mexillón de Galicia” e “ Paté de Mexillón de Galicia”. A terceira, baseada en Mexillón de Galicia no seu xugo, ofrecerá “Croquetas caseiras de Mexillón de Galicia” e “Empanada de trigo con Mexillón de Galicia”.

O 23 de novembro, os alumnos elaborarán un menú que poderá degustarse no restaurante Álvaro Cunqueiro do Carlos Oroza. Ese día haberá “Croquetas de Mexillón de Galicia con pasta katafi”, “ Ceviche de Mexillón de Galicia” e “ Mexillón de Galicia thai”, de primeiro. Logo servirase “Crema de Mexillón de Galicia con coca crocante” e “Trisotto ría e monte”.Unha sobremesa de froitas inverno e xeado poñerá fin á comida.

Esta colaboración pecharase o 14 de decembro cun novo show- cooking que se abrirá con “Mexillón de Galicia tigre ao curry” e “Mexillón de Galicia con vinagreta de cítricos” (ambos realizados con mexillón fresco). A continuación será a quenda para “Mexillón de Galicia en escabeche sobre pataca confeitada” e “Crema de Mexillón de Galicia” (para os que se recorrerá a mexillón en conserva).

O último bocado estará integrado por “Mexillón de Galicia Bloody Mary” e “Empanada de Mexillón de Galicia e algas”.