Mexillón de Galicia estará o sábado no salón de turismo Xantar

A DOP Mexillón de Galicia estará presente de novo na 18 edición de Xantar, o Salón Internacional de Turismo Gastronómico que se celebra en Ourense ata o domingo.

Esta cita, dedicada á promoción do turismo e a enogastronomía, reúne no recinto de Expourense a 232 expositores (un 10% máis que na edición anterior) procedentes de 11 países (España, Portugal, Panamá, Costa Rica, México, Ecuador, Paraguai, Francia, Perú, Cuba e Arxentina).

O programa inclúe un importante apartado de catas e degustacións de produtos do mar no que Mexillón de Galicia ocupará un lugar destacado. Será o sábado, día 4, a partir das 13,30. A esa hora comezará a sesión “Mexillón de Galicia. Garantía de Calidade e Orixe” dirixida polo cociñeiro Miguel Mosteiro.  Xunto a el estará Gabriela André, responsable de Promoción e Márketing da DOP, quen explicará de forma pormenorizada aos asistentes que fai de Mexillón de Galicia un alimento único.

O seu sabor e textura inigualables, xunto a unhas cualidades nutritivas de primeira orde, poderán ser constatadas coas tres receitas que elaborará Mosteiro para a ocasión. “Mexillón de Galicia con guacamole e tomatiños encurtidos”, “Mexillón de Galicia en escabeche de albariño e cítricos”, e “Mexillón de Galicia en bilbaína con pataca de Galicia chafada, brotes tenros e laranxa”.